يمر طريق سريع وسط مبنى برج "جيت تاور" في أوساكا باليابان

ده الموضوع اللي بدأت بيه..

وكان أول القصيدة كفر
مالقيتش أي حاجة عن الـ"jet tower" ده
قلت يبقى فكرتي القديمة كانت صح عن الباب ده
لكن لقيت إن الحق مش عليهم.. الحق عليا أنا
وفعلا الـ"gate tower" ده موجود وحقيقي!!

مبنى من أكتر المباني غرابة في اليابان.. وفي العالم
اسمه gate tower أو beehive (خلية النحل)..
مبنى خاص بشركة.. له مقطع دائري، وهو معمول كله كمكاتب للشركة دي ، ما عدا الأدوار الخامس والسادس والسابع
وده لسبب بسيط جدا (شئ عابر جدا يعني).. إن في طريق سريع بيعدي فيهم (شئ طبيعي جدا.. مش كده؟!)

طبعا المبنى مشهور في أوساكا وفي اليابان كلها بسبب الحل الوسط الغير طبيعي واللي تم بين مالك الأرض والشركة المسئولة عن الطريق السريع

الأرض دي في الأصل كانت تابعة لشركة بتعمل في مجال تصنيع الأخشاب والفحم..

وفي سنة 1983 قررت الشركة دي إنها تبنى مبنى تاني أكبر بدل المكاتب القديمة اللي كانت موجودة في المكان
لكن ده تعارض مع الخطة المرسومة من مخططي المدينة باستغلال المنطقة اللي فوق المبنى كطريق سريع (!!)
وبعد خمس سنين من المفاوضات توصلوا للحل الفريد والعبقري ده
(الطريق يعدي من المبنى.. إيه المشكلة يعني؟)

اتبنى المبنى واتعمل الطريق السريع بحيث إنهم ما يلمسوش بعض.. ويبقى كل واحد مستقل بذاته
واتعملت دعامات الطريق بجانب المبنى، ومالهاش علاقة بيه خالص

(يعني بالمصري.. صباح الخير يا جاري.. إنت في حالك وأنا في حالي)

واتعمل بتقنيات معينة بحيث ما توصلش الدوشة والاهتزازات الناتجة عن الطريق للمكاتب في المبنى
واتعمل الأسانسير يطلع من غير ما يقف في التلات أدوار دي
(عشان ما حدش يفاجأ إن عربية خبطته في العمارة)

العنوان : Fukushima 5-4-21, Fukushima-ku, Osaka
تم الانتهاء من البناء سنة : 1992
مساحة الموقع : 2,353 متر مربع
مساحة المبنى : 760 متر مربع
مجموع مساحات الأدوار : 7,956 متر مربع
طريقة البناء : Reinforced concrete and partly steel frame
الارتفاع : 71.9 متر
الطوابق : 16 دور.. ودورين تحت الأرض.. ودور كـthe mechanical penthouse
الغرض من المبنى : مكاتب لشركة
مصمم المبنى: Azusa Sekkei and Yamamoto-Nishihara Kenchiku Sekkei Jimusho
شركة البناء : Sato Kogyo Co. Ltd