Believe It Or Not: سبتمبر 2010

الثلاثاء، 21 سبتمبر 2010

مكان للركن في بوسطن بـ300 ألف دولار

at 11:02 م Posted by غير معرف

300 ألف دولار
بالمصري يعني أكتر من مليون وستمية وتمانين ألف جنيه مصري !!

اتدفع فعلا المبلغ ده.. في مكان لركن عربية (واحدة) في "باك باي" في "بوسطن"
عشان يبقى أغلى مكان لركن العربيات في العالم

"ديبرا سورديلو" السمسارة اللي أتممت الصفقة قالت إن المنافسة اشتعلت بين اللي كانوا عايزين يشتروا المكان ده، وده اللي خلى السعر يرتفع من 250000 دولار لـ300000 دولار
لكن الفائز طلب عدم الإعلان عن هويته

ورغم إن المبلغ ده يمكن أكبر من تمن منازل كتير.. إلا إن "ديبرا" بررت ده بإن :

في أماكن ركن كتير في المدينة.. لكنها قليلة جدا في المنطقة دي

في السنة اللي فاتت أماكن الركن كان متوسط سعرها 134 ألف دولار.. والسنة اللي قبلها كان المتوسط حوالي 127 ألف (بس)

والجميل إن أي واحد راكب دراجة.. يقدر يركن دراجته قريب من المكان ده مجانا

البائع اللي باع المكان ده بيقول إنه حاليا بيحاول يبيع شقة بغرفيتن نوم بـ2.5 مليون دولار.. لأن ليها أسانسير خاص ومكان خاص في جراج العمارة

الرقم ده هو اللي حطم الرقم القياسي السابق واللي بلغ 250 ألف بس :

* * * * * * * * * * * * * * * * * * * *

فيديو للمكان:

http://www.msnbc.msn.com/id/31314404/ns/business-local_business/

* * * * * * * * * * * * * * * * * * * *

لينكات : http://www.boston.com/business/articles/2009/06/11/300000_price_sets_record___for_parking/
http://wbztv.com/local/parking.space.price.2.1039825.html

http://www.msnbc.msn.com/id/31314404/ns/business-local_business/

الاثنين، 20 سبتمبر 2010

يدفع السجناء في سان بيدرو أجرة زنازينهم.. وأكثر

at 8:39 م Posted by غير معرف

سجن سان بيدرو..
أكبر سجن في "لا باز" في دولة "بوليفيا"، واللي يعتبر مجتمع متكامل مستقل بذاته، وده الفرق الكبير اللي بينه وبين أي منشأة إصلاحية تانية..

النزلاء في سجن سان بيدرو لهم وظائف، وبيدفعوا تمن الوحدات اللي بيقعدوا فيها في السجن (تمليك أو إيجار)، وممكن حتى يعيشوا مع أسرهم في السجن ده..
عشان كده طبيعي جدا إنك تلاقي أطفال كتير بتلعب في (شوارع السجن)

بيعيش فيه حوالي 1500 سجين بالإضافة لبعض الزوار اللي في الفندق التابع للسجن
السجن متقسم لـ8 أجزاء.. بتختلف من حيث الرفاهية في كل جزء منها.. فهنلاقي إن في الجزء الأكثر رفاهية.. الوحدات فيها حمامات مستقلة ومطبخ وتليفزيون بقنوات الـcable.. والوحدة من الوحدات دي سعرها بيكون حوالي 1500-1800 بوليفيانو، وحصل مرة إن في سجين دفع فلوس لبناء دور تاني فوق الوحدة بتاعته عشان يبقى عنده view أحسن !!!!!!!!

لكن طبعا زي ما إحنا عارفين.. إن دايما الناس طبقات..
فأغلب السجناء بينزلوا في ظروف أصعب من كده بكتير، وممكن ينزلوا في غرفة لخمس سجناء (يا حرام!)

صورة لوحدة أحد النزلاء.. الوحدة 25.. مساحة 4 متر مربع، اللي قال عنها:
"ما قدرتش أشتريها فأجرتها بتمانين بوليفيانو في الشهر (حوالي عشر دولارات).. أخدت الوحدة دي لنفسي
فيها مطبخ صغير وشباك بيدخل الشمس.. عشان كده هي مش سيئة، لكن أصعب شئ هو عدم قدرتي على رؤية مراتي
لأنها في سجن تاني"

كل مجموعة وحدات من التمانية بيبقى فيها السوق الخاص بيها وبيبقى فيها أماكن للعب البلياردو والبوكر والشطرنج وألعاب الفيديو جيم، بالإضافة لوجود ملاعب كرة قدم..

ودايما بيبقى في منافسات بين سجناء كل مجموعة وحدات، وممكن اللاعبين يتم شرائهم وبيعهم بين الفرق كمان، وبيتعمل على المباريات رهانات وصلت في احدى السنين لعشرين ألف دولار أمريكي

المحلات والكانتين بيملكها وبيديرها السجناء، في طبعا محلات بتبيع المكونات اللي ممكن أي حد يستخدمها في الوحدة بتاعته لو فيها مطبخ خاص

في السجن موجود فندق للسياح، ومستشفى وعدة كنائس، وحضانات للأطفال اللي هييجوا مع أسرهم لزيارة السجناء

"مش كل النزلاء بيحبوا أكل الكانتين، عشان كده بنبيع بعض السندويتشات للنزلاء ولأسرهم اللي بيزوروهم"
بيدرو، مالك فَرشِة الأكل دي

بيع الكوكايين للسياح بيوفر لكتير منهم دخل كبير داخل أسوار السجن.. خصوصا إن بيتم إنتاجه في معامل كبيرة داخل السجن، بالإضافة لكميات صغيرة بيتم إنتاجها في وحدات السجناء بأجهزة بدائية، بالإضافة لإنتاج المشروبات الكحولية بكميات كبيرة واللي بيمثل مصدر دخل كبير لعدة نزلاء

"اسمي فريدي جوانتو، موجود بسبب تهمة قتل.. موجود من خمسة وعشرين سنة ومش هاخرج من هنا أبدا"
قال فريدي جوانتو، ورائحته chicha.. نوع من الكحوليات

بالإضافة للاتفاق مع موزع منتجات كوكاكولا، بأن يتم بيع منتجاتها والإعلان عنها في السجن، ويتم منع المنتجات المنافسة..

وفي المقابل بتوفر لهم فلوس وكراسي وشمسيات للسجن

غير إن بعض السجناء بيشتغلوا في المهن المهمة التانية ، في محلات البقالة أو الحلاقة، بالإضافة لكون بعضهم مرشدين سياحيين للزوار من خارج السجن، واللي تكلفة الرحلة السياحية الواحدة زادت بسبب زيادة الطلب لحد ما وصلت في فبراير 2009 لـ250 بوليفيانو

بعض النزلاء بيتم ترشيحهم وانتخابهم لإدارة السجن ووضع القوانين الخاصة بيه
بالإضافة لإن السجناء ليهم الحق في المشاركة في التصويت في الانتخابات الخاصة بالدولة كمجلس الشعب والانتخابات الرئاسية، وده بيخلي المرشحين يزوروا السجن لزيادة شعبيتهم هناك

يمكن لأي إنسان زيارة المحطة الفضائية الدولية بـ 20 مليون دولار

at 4:46 م Posted by غير معرف

سؤال بديهي..
إيه هي المحطة الفضائية الدولية الأول؟

ISS أو International Spase Station

محطة فضاء أطلقت عشان تحل محل محطة الفضاء الروسية مير، ودي تم بنائها والإشراف عليها بتعاون دولي بقيادة الولايات المتحدة وروسيا، وتمويل من كندا واليابان و10 دول أوروبية تانية

هدفها الأساسي تحضير الإنسان لتمضية أوقات أطول في الفضاء..

المشروع بدأ في عام 1994 و تم إطلاق الوحدة الأولي سنة 1998 ، وتكلفتها وصلت 100 مليار يورو "!!!!!"
حاليا موجود عليها أربعة رواد فضاء، وبها على الأقل أربعة مختبرات لعمل اختبارات مختلفة في مجالات مختلفة زي الأحياء والفيزياء وعلوم الفضاء، ولها بيئة معينة لاختبار الأنظمة المستخدمة في المركبات الفضائية واللي هيحتاجوها في الرحلات اللي هتروح للقمر وللمريخ.. خصوصا اختبارات الصيانة والأمان والتشغيل، واللي هيبقى صعب إرسال رحلات لمسافات بعيدة بدون التأكد من صلاحيتها كلها

وزنها يبلغ حوالي نصف مليون كجم، وسرعتها 27724 كيلومتر في الساعة.. وبالتالي.. بتعمل لفة كاملة حول الأرض كل 90 دقيقة، وبتلف كل يوم حوالي 15.7 دورة حول الأرض..
وطبعا كانت المشكلة بالنسبة لروادها هي إن الشمس بتشرق وتغرب عليهم في اليوم الواحد 16 مرة، فبالتالي اعتمدوا وقت جرينتش هو الوقت الرسمي هناك، ولما الشمس بتغرب في لندن، النوافذ بتقفل أوتوماتيكيا عشان تدي الرواد احساس الليل والنوم، ولما بتشرق في لندن بيبدأوا يومهم ويشتغلوا عشر ساعات يوميا (ما عدا يوم السبت خمس ساعات)

أما أرضيا فبيتم التحكم فيها من الأرض من خلال محطات في هيوستن في الولايات المتحدة والتانية في موسكو في روسيا، ومحطات تانية في اليابان وفي كندا وفي أوروبا
في نوفمبر 2009، المحطة كانت مكونة من 11 وحدة بأنظمة معقدة علمية وأجهزة للحفاظ على الضغط بها، وتزود بالكهرباء عن طريق الطاقة الشمسية من خلال 16 صف من وحدات تحويل الطاقة الشمسية، بالإضافة لأربع صفوف متصلة بالوحدة الروسية
المحطة عبارة عن مختبر فيه فريق عمل دولي على ارتفاع 390 كيلومتر.. وطبعا هي المشروع التكنولوجي الأكثر تعقيدا على الإطلاق في تاريخ البشرية والفضاء..
وبيتم تنفيذ تجارب معينة وعمل تجارب جديدة واختبارات جديدة بشكل دائم، وبيتم إرسال بعثات علمية كل فترة للمحطة، وممكن كل بعثة تمتد لمدة عدة شهور.. على سبيل المثال.. الرحلة Expedition 15 قامت بعمل 138 بحث علمي، والنتائج يتم نشرها كل شهر

* * * * * * * * *

نرجع للموضوع الأصلي..
الناس اللي راحت على نفقتها الخاصة

دنيس تيتو.. Dennis Tito

أول "سائح فضاء"..
وده اللقب اللي أطلق عليه لأنه أول رائد فضاء يروح الفضاء على نفقته الخاصة، بعد ما دفع للمسئولين الروس 20 مليون دولار، وبعدها سافر على سفينة فضاء روسية في رحلة.. جعلت دنيس (60 سنة) رائد الفضاء رقم 415، ورقم 1 كمسافر للفضاء على نفقته الخاصة.. وخلت الحلم أصبح حقيقة لرجل الأعمال الأمريكي

تيتو بدأ عمله المهنى كعالم في علوم الفضاء، وصمم مسارات ثلاث رحلات للمريخ في الستينات، وعمل في ناسا لمدة 5 سنوات، بعد ما سابها لإنشاء شركة تمويل واللي من خلالها جمع ثروته، لكن رغم الملايين.. أصر على إنه يواصل محاولاته ليسافر للفضاء لعمل جيل جديد من سياح الفضاء
كان بداية محاولاته سنة 1991 في رحلته لموسكو، واللي أخد منها تذكرة سفره للفضاء، واللي بعد كده أصبحت لاغية بفضل قرار روسيا بإيقاف عمل محطة مير الفضائية قبل أن تسقط من الفضاء خارجة عن التحكم الأرضي

بعدها عرضت روسيا عليه السفر في صاروخ روسي لمحطة الفضاء الدولية، لكن ناسا "اللي بيشتغل فيها" اعترضت لاعتبارات أمنية..

ولكن في النهاية وافق المسئولون بعد ما وقع دنيس على إقرار يعفي وكالات الفضاء من أي مسئولية في حالة وقوع أي مشكلة أو مأساه.. وهو أقر بإنه مستعد لدفع أي تعويضات في حالة تسببه في أي خسائر
ورغم إنه أول شخص يدفع مقابل الرحلة دي، لكنه مش أول مواطن عادي غير متخصص يسافر للفضاء بعد محاولة ناسا لإرسال شخص عادي للفضاء واللي انتهت بانفجار أودى بحياة جميع طاقم الرحلة دي سنة 1986

دنيس معترض على كلمة "سائح فضاء" لأنه ما صرفش الفلوس دي كلها لمجرد الفسحة في حتة غريبة.. لكن هو عايز يعمل عدة تجارب أعدها سابقا، وعايز يشوف نتايجها بالإضافة لإنه عايز يستخدم الرحلة دي لفتح مجالات جديدة في أعماله

* * * * * * *

شيخ مظفر شكر

جراح عظام ماليزي.. وهو أول ماليزي يسافر للفضاء بعد الاتفاق مع المسئولين الروس في 10 أكتوبر 2007 مع الرحلة Expedition 16 .. وعاد للأرض في 21 أكتوبر 2007

وده حبيت أذكره هنا لأنه كان مسلم.. وكانت الرحلة في أواخر شهر رمضان.. وده اللي خلى لجنة الفتوى المحلية في ماليزيا تصدر أول كتاب لإرشاد المسلم في الفضاء والكتاب اللي كان عدد صفحاته 18 صفحة كان اسمه
Guidelines for Performing Islamic Rites (Ibadah) at the International Space Station

وكان بيشرح إزاي يقيم الصلاة في بيئة ضعيفة الجاذبية زي محطة الفضاء الدولية، وإزاي يستقبل القبلة في مكة!، وكيفية تحديد مواقيت الصلاة، والمواضيع المتعلقة بالصيام.. خصوصا مع شروق الشمس وغروبها 16 مرة يوميا.. وتم إصدار الكتاب بالعربي والإنجليزي والروسي

ومظفر احتفل بالعيد هناك في 13 أكتوبر، وقدم لطاقم المركبة مخبوزات وبسكويتات للاحتفال بالعيد معاه

-----------------

للمزيد:
http://en.wikipedia.org/wiki/Interna..._Space_Station
http://ar.wikipedia.org/wiki/%D9%85%...84%D9%8A%D8%A9
http://www.google.com.eg/search?hl=a...N&tab=iw&tbo=0
http://en.wikipedia.org/wiki/Sheikh_Muszaphar_Shukor
http://www.spacefacts.de/bios/intern...har_sheikh.htm

الأحد، 19 سبتمبر 2010

الياباني كيتشي إيواساكي يسافر حول العالم بدولارين

at 5:52 م Posted by غير معرف

الياباني كيتشي إيواساكي.. ركب الدراجة بتاعته مسافة 29000 ميل.. أو 45000 كيلو متر، خلال 37 دولة

بعد ما خرج من بيته في اليابان من حوالي 8 سنين.. وفي جيبه ما يعادل £1!!!

كيتشي إيواساكي .. واللي عمره 36 سنة، سافر من بلده على الدراجة بتاعته (رالي شوبر/Raleigh Shopper) سنة 2001 في الرحلة الغريبة دي..
أخد عبارة لكوريا الجنوبية.. ومن الوقت ده بدأ رحلته على الدراجة في السبعة وتلاتين دولة من غير ما يرجع بلده

القراصنة سرقوه..
واتقبض عليه في الهند..
كان في عداد الأموات لما هجم عليه كلب سريع في التبت..
و"شبه" تزوج في نيبال..

كيتشي في الخيمة بتاعته جنب الدراجة بتاعته في شارع مغطى بالثلوج في التبت
مايو 2003

إيواساكي ركب الدراجة لمسافة 45000 كيلومتر.. على دراجته المفضلة Raleigh shopper .. واللي اتسرق منه اتنين من النوع ده، وباظ منه اتنين تانيين.. وهو حاليا راكب الخامسة

كيتشي في صورة أمام تاج محل في الهند
ديسمبر 2004

أكبر إنجاز حققه في الرحلة دي إنه طلع على أعلى قمة في العالم.. قمة جبل إفرست، اللي ارتفاعه 8848 متر عن سطح البحر، بدون استخدام أي وسيلة نقل

صورة لكيشتي على ارتفاع 8848 متر فوق سطح البحر على جبل إيفرست، في نيبال
مايو 2005

إيواساكي اللي من مدينة ميباشي في اليابان قال إن إرادته القوية هي اللي خلته يقدر يواصل كل المسافة دي
وقال "معظم المسافرين والمغامرين بيحتاجوا فلوس للقيام بالرحلات دي، لكن بدل ما نضيع فرصة للسفر حول العالم.. عايز أقول إن الحلم ممكن يبقى حقيقة لو عندك إرادة قوية.. أنا باسافر من تمان سنين، ومكمل في السفر ده من خلال الفلوس اللي باجمعها من خلال أداء بعد الخدع للمشاهدين.. ومش معايا كريديت كارد أو شيكات"

وكمل " إرادتي القوية شئ مهم جدا، واتمنى إن الرحلة دي تثبت ده..
كنت عايز أسافر حول العالم وأنا في بدايات العشرينات من عمري، لكن ما قدرتش أحقق ده إلا وأنا عمري 28 سنة.. قلت لنفسي (حياتي هنتهي قريبا من غير ما أحقق أمنيتي) عشان كده، قررت أبدأ الرحلة"

"ما رضيتش أركب الطائرات لأني حبيت أشوف وأحس كل شئ بنفسي.. على الدراجة، أقدر دايما أحس الهواء والمناخ بتاع المكان اللي أنا فيه"

إيواساكي ساب البيت في 15 أبريل 2001 ومعاه 160 ين (حوالي 1£) في جيبه، بعد ما مل من العمل في شركة والده المتخصصة في أعمال التكييفات
وبدأ باللف في أنحاء اليابان لمدة سنة قبل ما يشتري تذكرة لجنوب أفريقيا في مارس 2002

ومن الوقت ده.. بدأت الرحلة على دراجاته الـRaleigh ، وكان الممول لده.. أدائه للخدع السحرية أمام المارة

أداءه لبعض الخدع السحرية للجماهير في جورجيا
أكتوبر 2006

في مايو 2005، أصبح أول ياباني يتسلق جبل إيفرست من مستوى البحر بدون مواصلات..

وأيضا جدف بمركب من منبع نهر الجانج في الهند حتى البحر.. الرحلة اللي كانت حوالي 1300 كيلو متر، وخدت منه 35 يوم

رحلته من منبع نهر الجانج
ديسمبر 2005

حاليا إيواساكي في سويسرا ينتظر تسلق أعلى جبل في أوروبا Mont blanc

على البحر في أسبانيا
أكتوبر 2008

صورة له في أسبانيا في جنيف
يوليو 2009

وبعدها .. هو مخطط إنه يسافر لأفريقيا حتى جنوب أفريقيا، وبعدها يرجع لليابان لأول مرة من عقد من الزمن عبر أمريكا الشمالية

وهو بيعتقد إن ده هياخد حوالي خمس سنين قبل ما يبدأ في كتابة كتابه عن الرحلة دي

البلاد اللي هو زارها:

South Korea, China, Vietnam, Cambodia, Thailand, Malaysia, Singapore, Laos, Nepal, India, Bangladesh, Pakistan, Iran, Azerbaijan, Georgia, Turkey, Greece, Bulgaria, Macedonia, Albania, Montenegro, Croatia, Bosnia & Herzegovina, Serbia, Hungary, Slovakia, Czech, Austria, Germany, Holland, Belgium, France, England, Spain, Portugal, Andorra, Switzerland.